“Գիտեմ քո գործերը, որ ոչ ցուրտ ես, ոչ տաք, ոհ թե ցուրտ լինեիր կամ տաք: Ուրեմն որովհետեւ գաղջ ես, եւ ոչ տաք եւ ոչ ցուրտ, քեզ պիտի փսխեմ Իմ բերանից” (Հայտնություն 3.15, 16): Երբ կարդում ես Հայտնության գրքի այս խոսքերը, քո մեջ հարց է ծագում. ”Ինչպես կարող է Աստված փսխել ինչ-որ մեկին”: Իսկապես, ինչպես կարող է Աստված նման ցանկություն ունենալ, չէ որ Նա սեր է:
Կարծում եմ, որ Աստված չի ցանկանում փսխել ոչ ոքի: Ինքներդ գիտեք, որ դա հաճելի բան չէ. ոչ ոք չի ցանկանա փսխել իր կերածը: Սակայն լինում են դեպքեր, երբ կերակուրը հին կամ թունավոր է լինում, եւ դու չես կարողանում մարսել կերածդ:
Պատկերացնում եք` կան մարդիկ, որոնք կարծես թունավոր կերակուր լինեն. Աստված ցանկանում է փսխել նրանց: Խոսքը վերաբերում է ոչ թե աշխարհիկ մարդկանց, այլ գոլ քրիստոնյաներին: Գրված է. ”…որովհետեւ գաղջ ես, եւ ոչ տաք եւ ոչ ցուրտ, քեզ պիտի փսխեմ Իմ բերանից”:
Աշխարհիկ մարդիկ սառն են, որովհետեւ ընդհանրապես չեն հավատում Աստծուն, բայց այն քրիստոնյաները, ովքեր, ճանաչելով Տիրոջը, շարունակում են ապրել մեղքերի մեջ, դառնում են գոլ: Մեղքը կարծես սառույց լինի, որը հանգցնում է նրանց սրտերում Աստծո սիրո կրակը եւ գոլացնում նրանց քրիստոնեական կյանքը:
Սիրելինե´րս, մենք պետք է հրաժարվենք գոլ կյանքից: Եկեք ականջ դնենք Աստծո Խոսքին եւ փոխենք մեր կյանքը. դառնանք տաք քրիստոնյաներ: Եթե դու ճանաչում ես Տիրոջը եւ զգացել ես Նրա ներկայությունը, այլեւս չես կարող լինել սառը:
Եկեք սթափվենք, պարզապես թափ տանք մեր վրայից ամեն տեսակի մեղքերը եւ ապրենք տաք քրիստոնեական կյանքով:
Տերը օրհնի ձեզ: Ամեն
Tags: գոլ, Արթուր Սիմոնյան, ոչ տաք, որ ցուրտ, Կյանքի Խոսք, քրիստոնեական կյանք
